كشفت الممثلة داليا البحيري عن تعرضها لحادث سير، وذلك من خلال نشر صورة عبر حسابها الخاص على “إنستغرام”، حيث تحدثت عن تفاصيل الحادث ونجاتها منه بأعجوبة.
ونشرت داليا صورة من الحادث وعلّقت قائلة:” الحمد لله علي كل شئ طبعاً… لاننا لازم نحمد ربنا علي كل حاجة وفي كل وقت… اللي يعرفوني كويس حيعرفوا أني من محبي شهر الصيف جداً… بحب البحر والشمس والسمار ولمة العيلة وكل حاجة في الصيف جميلة حتي فاكهته… بس الحقيقة السنة دي كانت من اسوء الصيفيات اللي عدت عليا في الساحل… يتخللها بعض اللمحات الجميلة مع العيلة وبعض الأيام الطيبة… بس للأسف كنت مضغوطة جداً”.
وأوضحت داليا: “كنت بعزل من بيت لبيت… ودي كانت حاجة مفاجأة مش مترتب لها عشان كده كنت مشدودة… مناعتي وقعت وبقالي ٣ اسابيع عيانة جداً! جالي دور برد او كورونا او زي ما تحبوا تسموه… ولما ابتديت اخف شوية حسن جوزي اتعدي وتعب جدا! اكتر مني بكتير لدرجة اننا اضطرينا نروح مستشفى! وقعدنا ٤ ساعات هناك في الديپ فريزير! تكييييييف عاااالي جدا جدا لدرجة كنا موجوعين من البرد”.
وأضافت: “رجعنا من المستشفى وبعد اقل من ساعة كانت حرارتي طلعت تاني ورقدت ومن يومها وانا مش بتحسن. ويكتمل السيزون برجوعي سايقة من الساحل وانا تعبانة لاني كان عندي ارتباط مهم في القاهرة والكاوتش بتاع عربيتي يتفرتك ويطلع دخان! بحمد ربنا انه كان عند دخلة البوابات وماكنتش ماشية بسرعة. ده ستر ربنا الجميل… باختصار كان صيف مشحون جدا بس برضو حافضل احب الصيف وأفضله… دعواتكم بقي اخف لاني استويت… ملحوظة أنا مش بحب اعمل بوستات زي دي عشان أنا عمري ما كنت بتاعت صاعبنيات”.
وتوجهت داليا بالشكر لرجال المرور الذين ساعدوها أثناء الحادث، قائلة: “وكمان كان لازم اشكر رجال المرور اللي كلهم شهامة وساعدوني وركبولي الاستبن… اي نعم كانوا عايزين يمشوني بسرعة عشان في تشريفة سيادة الوزير معدية بس برضو جدعان”.
من ناحية أخرى، تشارك داليا في مسلسل “بدون مقابل” الذي توقف تصويره منذ العام الماضي، ويتبقى أسبوع فقط على إنهاء آخر مشاهده تمهيداً لعرضه قريباً. المسلسل يسلط الضوء على بطولات رجال الأمن، ويشارك فيه عدد من النجوم بينهم هاني رمزي، عمرو عبد الجليل، وفاء عامر، نسرين طافش، وهبة عبدالعزيز، وهو من إخراج جمال عبدالحميد وتأليف حسام موسى.
تجسد داليا في أحداث المسلسل شخصية أشجان، سيدة بسيطة من الإسكندرية، أرملة وتعمل أخصائية اجتماعية، تضطر للسفر إلى القاهرة من أجل علاج ابنها المريض، وهناك تواجه العديد من المواقف وتحدث لها قصة مثيرة بعد لقاءها بهاني رمزي، والتي تتكشف مع تقدم الحلقات.
