من وحي الضجة الوزارية والاعلامية بوسائلها كافة حول عودة المغتربين لقضاء الله وقدره لبنان أنقل حواراً جرى بين “الراجع” وأحد المقيمين في جمهورية مكافحة الفساد في الضوء والمياه…
المقيم: شايفك مش مرتاح، صار معك شي وانت ضاهر من الأمن العام؟ شفت شي ما عجبك ع طريق المطار؟!
الراجع: ملاحظتك بمحلها كأنك طبيب نفسي
المقيم: احكي بدون تردد، بعد فيك تحكي شو ما بدك…
الراجع: ما لاقيت حالي، ولا أهلي بالوطن ولا حتى الوطن مع أهلي
المقيم: يعني عندك شعور (وهَي لوحدها مشكلة) بالوحدة والغربة
الراجع: تمام
المقيم: كل الناس صارو هيك ما تكبّرها
الراجع: غريب
المقيم: تعودوا. والعادة طبيعة تانية
الراجع: بس وين ايام زمان الحمرا… والضجيج والسواح…؟
المقيم: نصيحتي الك أو أول وأهم نصيحة: حط قفل حديد على الماضي. الماضي، مضى ما تفكر فيه أحسن ما تجّن…
الراجع: طيب والحاضر…؟
المقيم: ابن حرام، بتذكر فيلم “ابن حرام”؟
الراجع: بعدك عم تنصحني انسى الماضي
المقيم: مش كل الماضي
الراجع: خلينا نتأمل بالمستقبل
المقيم: أوعا اياك تتأمل
الراجع: يا صديقي حيرتني. الماضي ممنوع والحاضر ابن حرام ومع ولاد… والمستقبل شو؟
المقيم: سكوت قلتلك بس احكي عن شي محدد…
اوعا تحكي عن المستقبل لأنو الحلم ممنوع، انت هون أداة منزلية صامتة
الراجع: أداة منزلية، شو أنا بمطبخ أو أوتيل؟!
المقيم: انت شي “متل هيك” كل نشاط فكري يضر بصحتك ويضر بمن حولك، نصيحتي التانية أن تتحول الى صندوق
الراجع: صندوق فرجة؟
المقيم: لا صندوق تُعبأ (بضم التاء) بأي مادة. اصلاح وتغيير، سيادة لمكافحة الاحتلال الايراني شرط عدم المس بسلاح المقاومة والأهم أن تُعبأ بالمكونات اللبنانية!
الراجع: رجائي ما اتعبأ بالممنوعات
المقيم: غيرك. غير الانسان ما في ممنوعات حتى ممنوعات الصرف. صرفوها!
الراجع: بيطلعلي مطلب واحد شرعي؟
المقيم: تفضل…
الراجع: صرفني بسرعة، فأنا غير صالح للصندقة
المقيم: بتأمر بس خليني شوف قديه سعر الصرف والبقية بحياتكم مع العلم انو مطلبك شرعي بس مش دستوري.